تكلفه المالديف

بغيت اسال عن جزر المالديف جم التكلف لو كانت الرحله اسبوع و المانيا ميونخ 10 ايام لشخصين جم التكلفه تكون .

نجمة برونزية :

مرحبا أختي , بالنسبة للتكلفة تختلف من شركة سياحية لأخرى . شوفي الشركات السياحية الثقة واسأليهم وقارني بين التكلفة . ومرات الشركات السياحية أو شركات الطيران يسوا عروض تسوقية أو بكج مخفض في مواسم معينة لبعض الأماكن السياحية في العالم . بالتوفيق

تاجرة برونزية :

موفقه

نجمة جديدة :

المالديف اسبوع ملللللل بصراحه حدها 4 ليالي خاصة عقب الساعه 6 المسا ماعندج اي شي تسوينه غير تقعدين فالغرفه ... انا سافرتلها 4 ليالي والسفره ككل كلفتني مابين 5000-6000 درهم

نجمة برونزية :

السلام عليكم على حسب إنتي سايرة المالديف ويا الأهل والا ويا الزوج؟ وتبون جزيرة تكون فيها فعاليات يعني رياضات مائية والا بس تبون مكان هادي نفس الجزر اللي تكون حق شهر العسل؟ أنا سرت ويا ربيعتي جزيرة اسمها "مافوشي" التذكرة كانت 3500 درهم لكل شخص على طيران الإمارات الجزيرة صغيرة وفيها نشاطات مائية روعة، مثل الغوص والسنوركلنق وتتحوطين على السفن الشراعية، وزرنا جزيرة الكاكاو الفنادق محدودة في هالجزيرة بحكم إنها جداً صغيرة وما فيها منتجعات، فندقنا كان اسمه Kaani Beach Hotel هو مكوّن من 3 طوابق فقط، الليلة بـ 300 درهم الفندق صراحة غرف نظيفة وأهم شي عندهم واي فاي، نحن قضينا الوقت أكثر شي نشاطات بحرية ونرد الفندق بس حق نرقد بس كان صراحة شي جميل بالنسبة للسعر أما لو تبين تسيرين منتجعات، المنتجعات جداً غالية عادي الليلة توصل لـ 6000 درهم بس هذا للعرسان أو شهر العسل و الجزر تكون جداً غالية والنشاطات البحرية اللي فيها جداً قليلة (إن وُجدت) ويكون المنتجع شاري هالجزيرة كاملة، يعني حق تجوفين جزيرة ثانية لازم تركبين الزورق وتسيرين ملاحظة: الشعب المالديفي من أرقى الشعوب اللي شفتها ومن أطيبها، كلهم يبتسمون في ويهج ويرحبوبج وما تلقين حد منهم يشحت أو يترياج تعطينه خردة أو بقشيش، عندهم المحلات تبنّد على كل صلاة، والمالديف بكبرها ما فيها خمر إلا في اليخوت وهالشي اللي فعلاً عيَبني فيها يعني تدخلين الفندق وانتي متطمنه ما بتجوفين حد راجع سكران أو شي من هالقبيل