فنادق مكة المكرمة

السلام عليكم ورحمه الله وبركاته شخباركن بنات؟ كيف الصحة ؟ حبيت استفسر عن الفنادق اللى حوالين الحرم المكي شو هى الفنادق اللى تحسوها نظيفة وحلوة وأسعارها معقولة؟ والغرفة الوحدة كم سرير فيها وهل تجي سويت ؟ .

نجمة برونزية :

الابراج احسن شي وخصوصا زمزم والتوحيد .. بزمزم سكنا ببرج هاجر وايد حلو ومرتب ومجابل الحرم .. بس الاسعار تختلف من وقت والثاني

تاجرة برونزية :

[IMG]http://w.*.org/images/gzddy9lja582f3t733cr.gif[/IMG]

نجمة :

وعليكم السلام ورحمة الله وبركاته هلا أختي أفضل الفنادق حول الحرم .. انتركونتننتال التوحيد وهو أغلاهم يعني الغرفة في حدود الـ 10 مع الريوق خلال هذي الأيام ويمكن اتحصلينه شوي ارخص والحين ينافسه رافلز .. وفتحوه يديد ضمن أبراج البيت .. فيه بس سويتات ماشي غرف وأسعاره تبدأ لهذا الموسم من 1150 درهم هذي أغلى الفنادق وطبعا أفضلها بعديين اييج أبراج البيت ومجموعة الفنادق الي فيه وتقريبا كلهن زينات والاسعار معقوله وتتفاوت من واحد للثاني وهي زمزم جراند الصفوة هاجر رويال دار الإيمان رويال دار الغفران وكلهن في حدود 400 إلى 500 للغرفه الثنائية ورويال دار الإيمان امسوي عرض هالفترة الغرفة الثنائية بـ 370 تقريباً .. شوفي مكاتب السفريات اذا حابه وعندج الهلتون بعد حلو شي الهلتون الفندق وأبراج مكة هيلتون .. وغرفهم وايد وسيعه وكبيرة بس هي اقدمهم ومن سنتين تقريبا سووا تجديدات بالنسبة للغرف أغلبها اييج بسريرين .. وومن تجربتي واهلي انج اذا طلبتي غرفه ثلاثية ما اتكون اكبر .. هم بس يضيفون سرير للغرفة الثنائية فتحسينها تستوي ضيجه وبعد أغلب الفنادق فيها سويتات وعموما في الواحد أغلب وقته يكون برع الفندق في الحرم أو اذا بتتشريين.. وما اتيين الفندق الا للنوم او الراحة فترة الظهر أنصحج تحجزين التذاكر روحج وعقب اتشوين كم من مكتب سفريات وتقارنين أسعارهم وتاخذين اللي يناسبج حاولت اعطيج صورة عامة من تجربتي واتمنى اكون افدتج والسموحة ع القصور ولا تنسينا من دعواتج الطيبة

تاجرة برونزية :

انا سايرة من اسبوعين.. احسن شي ابراج هيلتون مكة.. لانها مقابل الحرم على طول.. الابراج مشكلتهن انج تطلعين من لوبي الفندق تاخذين الليفت بنزلج المول ومن المول تمشين الين الحرم.. متعب وبعد تأخرين لانه وقت الصلاة اتكون وايد زحمة على الليفتات.. من ناحية الاسعار.. ابراج هيلتون مكة وزمزم اوكيه ونفس الشي تقريبا وباقي الفنادق اللي في الابراج اغلى مثل الموفيمبك الرفيلز وغيره لانهن يداد وفخمات.. اغلبه الناس تمدح خدمة واكل ابراج هيلتون مكة.. اما زمزم ماشي اللي مطعم البوفيه وغالي.. ماشي رووم سيرفس.. تتصلين عليهم مايردون يذلونج على كل شي.. اخويه طلب من اللندري يكون كندورته حق صلاة الجمعة يابووها الجمعة فليل.. واتخيسين في الاستقبال الين ما اتسوين شيك ان واووت.. ومن ناحية السوق.. طبعا الابراج فيها مول.. وفالمول المحلات اللي متعودين عليها في البلاد.. اذا تبين تاخذين سيياييد ومسابيح وقهوة والتمور هالسوالف كلها احلى شي سوق ابراج مكة.. اذا انتم عايلة انصج بابراج هيلتون مكة.. غرفها اكبر واشرح وفييها سويتتات.. انشالله اكون افدج.. السموحة على القصور