بنات تقريبا كلنا جربنا تجربة السفر بطائرات ,,ونعرف شو أثرها على جسم الإنسان أنا عن نفسي أعاني ألللام لإي أذني ورأسي وريولي أبا كل وحدة تكتب شو أسوي عشان تتجنب مثل هاي المشاكل 1كيف يكون نظامكم الغذائي يوم السفر 2شو تسون خلال الرحلة في الطيارة أنا عن نفسي ماعرف أنام في الطيارة يلا كل وحدة تكتبلنا نصايح عشان الكل يستفيد.............
.
ان شالله الخوات بفيدونج متاابعه <
حلو الموضوع التعب يعتمد على وقت الرحلة ومدتها. اذا السفرة طويلة مثل امريكا. بصراحة ارقد. ادور لي اربع كراسي عدال بعض فاضيات واتمدد وارقد. لأنه الطريج طويل وكم بتطالعين افلام. ملل. فـ بصراحة احط راسي وارقد. طبعا الرقاد ما يكون عميق.. خصوصا انا نومي اصلا متقطع. بس اريح جسمي لأنه جسمي يتم يعورني اذا ما ريحت شوي. طبعا دايما افضل واختار طيارات الليل.. لأنها اهدا. بس اذا دول الخليج لأ. افضل بنهار لأنه الرحلة قصيرة وما يمديج تسرحين شوي الا وانتي واصله. قبل كنت اشل قصص وياي اقراها. بس قمت اتملل واحس بتعب. اشل جرايد ومجلات احيانا. سبحان الله فيني طبع موول مب زين. ليلة السفر ما ارقد.. مول ما اييني رقاد. وايلس ارتب اغراضي واحط واشل.. ولا احس بتعب مول.. خ يمكن من الوناسة. بس سبحان الله طبع. سواء طالعة من البلاد أو رادة البلاد. ماييني نووم. بالنسبة للأكل . انا أحرص على الثلاث وجبات. وأهمها الريوق.. وايد أحب اتريق. لأنه ورانا طلعة فأحب أكون متغذية حق المياعل والمياحش. في أروربا وامريكا ما عانيت في نوعية الأكل .. لأنه سهل تحصلين اللي تبينه. بس شرق آسيا. خصوصا الصين. تعبنا نفسيا لين حصلنا مطعم عربي خ وكل يوم عنده. لين حفظنا المينيو. احب اجرب الاكلات اليديده. بس لازم اعرف مقاديرها.. على الأقل الاساسية. حالي حال كل العرب خ السوق أهل أولوياتي في السفره.. يعني اتمشى واتطمش واتصور وكل شي. بس السوق شي ثاني.. عالم آخر.
مثل ما قالت الاخت امون يعتمد السفر على الوقت . طريقتج في تدبير الوقت قبل السفر.. بالنسبه لي طبعا مستحيل اقدر انام قبل السفر بس اجبر نفسي حتى لو اضطريت اشرب دوا كحه لول..ومع هذا يطير الرقاد بسرعه. في الطيارة عاده احاول اسلي نفسي اسولف ويا خواتي نلعب الالعاب ع التيفي مع بعض انشوف نفس الفلم مثلا.جيه يضيع الوقت.نادر ما انام لان النوم اصلا يطير مع فرحه السفر ..بس اكثر شي اتألم منه في الطياره ألم الأذن..اوف فضيع خصوصا يوم تقلع وتبدأ تستقر في الجو.وعند الهبوط.بس تعرفين ان هالحاله محد قدر يجد لها علاج لانها الاكثر شعبيه عند المسافرين.وسببها تغييرات سريعه في الضغط الجوي للهواء المحيط بنا..فالاذن الوسطى اظن بسرعه تتأثر لهذه التغييرات..لما سافرت مصر اكثر وقت عانيت فيه حتى وانا هناك كان الالم بعده موجود فيني..تعرفين حسيت ان اذنيه بتنطر من الضغط.والله ما عدت اسمع الي حولي..اقول لاختي خلاص صرت صمخه ما اسمع ..وهي ترمسني اقول لها ها شو تقولين علي صوتج..وهي اتقولي يالصمخه فضحتينا.. بس تعرفين شو الحل؟ هني الاذن تحتاج لكميه من الفقاعات الهوائيه وتحتاج للعاب يعني الفقاعات اطلعينهم من الاذن واللعاب تصرطينه بكميات كبيره ..يعني اول ما تقعدين في الطيارة حاولي اتخلين عندج غرشه ماي..او لبان او اي شي تاكلينه واول ما تبدأ الطيارة حركاتها علجي اللبان واشري الماي.عساس تفتحين مجاري الاذن > حلوه مجاري خ.. وعندج طريقه ثانيه وهي التثاؤب كل ما تثاوبتي طلعتي هوا لخارج الاذن ..وعندج بعد طريقه وهي انج اتسكرين اذنيج بصبوعج وتمزرين ثمج بالهوا وتحاولين تضغطين بالهوا لبرا الاذنين او الانف عشان تفتحين مجاري الاذن. احس وايد شرحت في الموضوع بس لاني احس انها معاناه. الشيء الثاني حاولي انج ما تثقلين عمرج بالاكل حاولي تكونين خفيفه عشان تستمتعين بالرحله لانج لو مزرتي الكرشه ما بترومين تتحركين مول وما بتحسين انج مرتاحه .. عني انا احاول إذا كان السفر بالليل الغدا ما اكثر منه لقمتين وانش.وانا في المطار اشرب كوب حليب بارد..او اكتفي بالماي..لانج جي جي بتتعشين فالطيارة . الآلام الاخرى الي ممكن تصاحب الواحد اثناء السفر الم الرجلين من القعده.حاولي هني كل شوي اتمدين ريولج لجدام والكرسي عورا عشان ترتاحين..في الطيارة حتى لو اتقولي المضيفه ردي ريولج اقوللها اوكي واطنش..حاولي على الاقل تروحين حمام الطيارة (الله يعزج) مرتين بس عشان تغسلين ويهج واتمضمضين بتحسين عمرج فرش وخفيفه. وحاولي دوم اتكون عندج الاسعافات الاوليه في شطنه الإيد.يعني حبوب بندول ..بانديج للجروح لصقات يعني كلينكس مطهر..علاج الحموضه (اينو) الباكيتات الصغيره..فكس مال الخشم يعني الشم بس يكون جي امبوب طويل.بخاخ الربو إذا لا قدر الله حد كان يعاني منه.. اما الاشياء الثانيه المهمه الي اتحطينها في الشنطه فهي: كلينكس جاف..فوط صحيه الرفيعه الصغيره (للضرورة)..ابر وخيوط علبه صغيرة مرة..ربطه شعر(احتياطي)..مشط صغير..مرايه صغيرة..عطر صغيير خاص للشطنه.حاولي شطنه اليد اتكون خفيفه لا تخلينا ثقيلة جنها طابوقه بتتعبين..يعني شلي الاشياء المهمه.. انا استغرب لما البنات يشلون شطن كبيره مالت اليد ويحطون فيها ادوات الميكب كلها والجراج مال التلفون وقصص وكتب وكريمات.هذا كله ما تحتاجينه ..وفي حال حابه اتشلين كريم حطيه في علب صغيره الحين متوفرة بكثرة هالعلب.اتكون كبر الصبع حطي فيه كريم الي تبينه اتكون قد الحاجه واتخفف عليج.ممكن اتشلين معاج كتيب الاذكار الصغير او البعض يحب يشل مصحف صغير..بس لو شليتي شيء ثقيل اخوج لابد بيتحرطم لانه بيشل وبيحط.وانتي بعد ايدج بتتكسر..ويوم تدخلين الطيارة بتمين اضاربين الخلق بهالشطنه..خ طبعا دخلت في مواضيع مالها خص..بس حبيت افيدج..وهذه الاشياء الي اقدر افيدج فيها..واسمحيلي على القرقره. وإذا عندي شي ثاني بضيفه عقب ان شاء الله.
كل شي اتحمله إلا تعب السفر من تغيير التوقيت واللي يسموه ال Jet Lag الساعة البيولوجية للجسم تختل. بالأخص لما اسافر امريكا .ولما أرجع أخس والله تمر عليج أيام يمكن اسبوع تقريبا وانتي تنامين عكس الناس خ نهارج ليل وليلج نهار. هذا الشي شر لا بد منه ومافي اي حل له. هذا الشي ماحسيته وايد لما رحت استراليا ونيوزيلندا. بس انا عموما لو كانت الرحلة في الليل ودخل وقت النوم اجبر نفسي اني انام لالالالالالالالالالازم تنامين لو ساعتين أو 3 بالأخص لو كانت الرحلة طويلة . نصحيتي لج سوي مثل اختي امون.لو مسافرة على الإكونومي خلي عينج على الكراسي الفاضية اللي بالنص وتجنبي الصفات الأخيرة لأن مسند اليد مايرتفع خ أول مايقولوا بوردنغ كومبليت .والكل ركب على طول هجوم على الكراسي خ وتمددي ونامي وانتي مرتاحة لو كنتوا عايلة تناوبوا في النوم على الكراسي اليتيمة خ اللي يشبع نوم يبدل مع حد ماقدر ينام. طبعا لو كنتي على البزنس والفيرست ما بتحسين بشي.مدي الكرسي ونامي مابيصحوج حتى للأكل لو تبين تواصلين نومج وعلى الفيرست بيخلوج نايمة لآخر حد قبل نزول الطيارة بوقت قصير بيصحونج. هذا غير ان الكراسي مزودة بنظام لتحريك الدورة الدموية إذا القاعدة الأولى نامي أكثر ساعات ممكنة. دايما وانتي قاعدة حركي ريولج فوق وتحت بالأخص الأصابع. وحاولي ما تطلعين ريولج من الجوتي فترات طويلة بتلاحظين انها بتنتفخ وما بتدخل مرة ثانية في الجوتي خ أو حاولي دايما ترفعينها فوق او تتمشين لو للحمام الله يعزج علشان تتجدد الدورة الدموية وما تنزل السوائل كلها في أطراف الجسم. لو نايمة لا تنامين وانتي ثانية ريولج فترات طويلة على نفس الوضعية.غيري وضعية النوم كل شوي. القاعدة الثانية حركي الأطراف. بالنسبة للأذن أسوأ شي لو عندج زكام او انسداد في الجيوب الأنفية .هذي اسوأ ألم ممكن تحسين به بسبب الضغط. حاولي تاخذين لج أدوية خاصة للجيوب الأنفية.لازم تفتحين القنوات المسدودة ولا بتتعذبين. ومثل ما قالت الإخت عيناوية العلكة تؤدي الغرض في الحالات العادية. القاعدة الثالثة فتحي قنوات الأذن المسدودة وعالجي مشكلة الجيوب. بالنسبة للنظام الغذائي انا شخصيا اقلل من الأكل والسوائل قبل وأثناء الإقلاع.وامتنع عن المشروبات الغازية قد ما اقدر في الرحلات الطويلة تتجمع غازات وايد في الجسم .وتسبب ألم في البطن وتحسس المسافر بالضيق. حاولي تروحين دورة المياة من فترة لفترة. القاعدة الرابعة قللي الأكل والسوائل. تجنبي المأكولات البحرية .معرضة أكثر شي انها تفسد.ولو كنتي راجعة من بلد شاكه في اكلهم.مثل الدول الآسيوية .حاولي تتأكدين ان الأكل محفوظ بطريقة جيدة ولا له أي طعم غريب ولا ريحة.وإلا بتقضين الرحلة كلها في الحمام الله يعزج خ. القاعدة الخامسة تأكدي من جودة وجبات الطيارة وطريقة حفظها قبل أكلها . تذكرت نقطة وحبيت أضيفها وهي لبس ملابس مريحة للطائرة.هالنقطة وايد مهمة لا تلبسين شي ضيق يضايقج في الرحلة.لبسي اريح شي عندج .علشان ماتضغط الملابس على الجسم وتعيق الدورة الدموية..خصوصا ان مدة الرحلة طويلة. القاعدة السادسة لبس ملابس مريحة هذي أهم النقاط واتمنى لج وللجميع رحلة سعيدة وممتعة خالية من التعب